Plantun de Prouvènço

Pèr coumpara dos planto d'encò nostre

Oxalis acetosella & Myosotis discolor

Pan-de-cougiéu

Oxalis acetosella

Oxalidaceae

Àutri noum : Pan-de-couvènt, Pan-de-couguou, Pan-de-couènt, Crousadello, Pascalo.

Noms en français : Oseille des bois, Surelle.

Descripcioun :
Lou pan-de-cougiéu trachis en tapis dins li bos fres e umide de mountagno. Se recounèis à si fueio di tres fuioun en couor e à si pichòti flour clinado en campano blanco e veinado de roso. Flouris pèr Pasco (Pascalo).

Usanço :
Es uno planto manjadisso en ensalado o cuecho (soupo, oumeleto...). Douno un bon goust acide. Pamens faudrié pas trop n'en manja malodi l'acide óussali (graviho dins li ren). Lou pan-de-cougiéu se manjo en mountagno à la sourtido de l'ivèr pèr reviscoula lou cors. Èi couneigu peréu pèr sougna lis acamp de la bouco o dóu cors. Èi tambèn richo en vitamino C.

Port : Erbo
Taio : 3 à 12 cm
Fueio : coumpausado
Tipe bioulougico : Emicriptoufite
Cicle bioulougico : Planto renadivo

Gènre : Oxalis
Famiho : Oxalidaceae

Ordre : Oxalidales

Coulour de la flour : Blanco
Petalo : 5
Ø (o loungour) flour : 12 à 20 mm
Flourido : Printèms

Sòu : Si
Autour basso e auto : 0 à 2200 m
Aparado : Noun
Abriéu à jun

Liò : Bos fres - Bos umide
Estànci : Mountagnard à Subaupen
Couroulougi : Bourealo
Ref. sc. : Oxalis acetosella L., 1753

Te-vese-e-t'ame(-di-dos-coulour)

Myosotis discolor

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Noms en français : Myosotis bicolore, Myosotis de deux couleurs.

Descripcioun :
Aquéu te-vese-e-t'ame, coume lou dis soun noum, a de flour de dos coulour, jauno pièi bluio. Es uno planto pas trop coumuno que trachis dins li pelouso sablouso bagnado l'ivèr. Isto uno meno proche que ié dison lou te-vese-e-t'ame-doutous, Myosotis dubia, que vèn dins li mémi relarg, que fai de flour d'abord blanco, pu pichoto e que la cambo, pu grando elo, a pas jamai li fuio d'en aut "óupousado".

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").